Индија во текот на 2025 година речиси двојно го зголемила планираниот капацитет за производство на јаглен, со што е главен двигател на глобалниот раст на планираните нови рудници за јаглен, покажува извештајот на Global Energy Monitor.
Според извештајот на Global Energy Monito, планираниот капацитет на индиските рудници за јаглен се зголемил од 329 милиони тони на 638 милиони тони годишно. Со тоа, Индија е одговорна за речиси целиот раст на глобалниот плански капацитет за нови проекти во секторот на јаглен.
На глобално ниво, планираниот капацитет на новите рудници за јаглен се зголемил за 11 проценти, достигнувајќи 2,521 милијарди тони годишно.
Зголемувањето на рударските капацитети во Индија е дел од стратегијата на владата во Њу Делхи за зголемување на домашното производство на јаглен, во услови на растечка побарувачка за електрична енергија.
Јагленот останува клучен за индиската енергетика
И покрај брзото зголемување на капацитетите за производство на електрична енергија од обновливи извори, јагленот и понатаму има клучна улога во индискиот енергетски систем.
Индиската влада има поставено цел производството на јаглен во фискалната 2025/26 година да достигне речиси 1,15 милијарди тони, додека до 2030 година целта е производството да достигне 1,5 милијарди тони.
Најголем дел од новите планирани рударски капацитети се концентрирани во источните индиски сојузни држави Џарканд и Одиша, региони со значајни резерви на јаглен.
Глобалниот капацитет расте, иако побарувачката забавува
Зголемувањето на бројот и капацитетот на планираните рудници доаѓа во време кога глобалниот пазар на јаглен се соочува со поинакви перспективи.
Меѓународната агенција за енергетика (IEA) очекува глобалната побарувачка за јаглен да достигне плато до 2030 година. Во исто време, производството на електрична енергија од ветер и сонце во 2025 година за првпат го надминало производството од јаглен во глобалниот енергетски микс.
Ова создава ризик за дел од планираните рударски проекти. Global Energy Monitor предупредува дека доколку побарувачката за јаглен се намалува побрзо од очекувањата, производителите би можеле да се соочат со неискористени капацитети и послаба економска исплатливост на новите инвестиции.
Помалку нови капацитети во Кина и Австралија
Иако плановите за нови рудници се зголемиле, реалното додавање нови производствени капацитети на глобално ниво се намалило.
Во 2025 година новододадениот капацитет паднал за речиси 40 проценти, на околу 113 милиони тони годишно, главно поради намалувањето на новите капацитети во Кина и Австралија.
Така, глобалниот рударски сектор се наоѓа во специфична ситуација: од една страна се зголемува бројот на планирани рудници, пред сè поради растот во Индија, а од друга страна се намалува реалното отворање на нови производствени капацитети и се зголемува неизвесноста околу идната побарувачка.
За Индија, сепак, јагленот останува еден од клучните ресурси за обезбедување стабилно снабдување со електрична енергија и поддршка на индустрискиот раст. Затоа земјата продолжува со развојот на нови рудници и зголемување на домашното производство, и покрај глобалниот тренд кон поголема употреба на обновливи извори на енергија.
