Полска може значително да го зголеми своето производство на бакар преку нови рударски проекти што ги развива канадската компанија Lumina Metals. Оваа насока ја зајакнува амбицијата на земјата да стане еден од водечките европски снабдувачи со бакар, метал кој е клучен за електрификацијата, електричните мрежи, обновливата енергија, електричните возила, електрониката и поширокиот индустриски развој.
Lumina Metals има направено три значајни откритија во еден од новите бакарно-сребрени региони во Полска. Главниот проект, Нова Сол, се наоѓа во југозападниот дел на земјата, во близина на постојните рудници и топилници на државно контролираната компанија KGHM Polska Miedź. Оваа географска близина е важна, бидејќи овозможува новите проекти да се поврзат со постојната рударска, преработувачка и металуршка инфраструктура.
Проектот Нова Сол опфаќа површина од 120 квадратни километри во Северниот бакарен појас на Полска. Од откривањето на наоѓалиштето во 2014 година досега се реализирани повеќе од 51.000 метри дупчење, а досегашните податоци покажуваат измерен и индициран ресурс од 604 милиони тони руда, со просечна содржина од 1,24 проценти бакар и 38 грама сребро по тон.
Овие параметри го позиционираат Нова Сол како едно од најголемите неразвиени бакарно-сребрени наоѓалишта во светот. Такви проекти се особено значајни во период кога Европа бара поголема сигурност во снабдувањето со минерали што се неопходни за зелената и дигиталната транзиција.
Полската стратегија оди подалеку од самото рударство. Целта е создавање поширок индустриски концепт односно т.н. „бакарна долина“, која би ги поврзала рудниците, преработката, рафинирањето, производството и индустриите со повисока додадена вредност. Таквиот модел покажува како минералните ресурси може да станат основа за цел економски екосистем, а не само за извоз на суровина.
Развојот на проектите на Lumina Metals се поврзува и со можни идни договори за снабдување со KGHM, кој е веќе најголем производител на бакар во Европската Унија. Во мај беше потпишано писмо за намери за разговори околу потенцијално снабдување со концентрат од проектот, што ја отвора можноста новите наоѓалишта да се интегрираат во веќе постојниот полски рударско-металуршки систем.
За развој на проектите се проценува дека ќе бидат потребни инвестиции од околу 6,4 милијарди американски долари, кои доколку се реализираат, проектите би можеле во првата деценија од работењето да обезбедуваат просечно годишно производство од околу 390.000 тони бакарен еквивалент.
Оваа вест е важна затоа што ја покажува новата улога на бакарот во Европа. Бакарот повеќе не е само традиционален индустриски метал, туку стратешка суровина за електрификација, модерни енергетски системи и дигитална инфраструктура. Земјите што располагаат со бакарни ресурси и капацитети за преработка ќе имаат значајна предност во новата индустриска економија.
Полска покажува дека современото рударство може да биде мотор на индустриски развој, локална преработка, нови работни места, технолошки развој и поголема европска минерална независност. Овој пример е релевантен и за други земји со минерален потенцијал, бидејќи ја потврдува важноста на поврзувањето на рударството со целосни синџири на вредност.
