Кинескиот антимонополски регулатор побарал од „Англо Американ“ да гарантира стабилно снабдување на Кина со бакарен концентрат како услов за одобрување на планираното спојување со канадската компанија „Тек Рисорсис“, вредно 54 милијарди долари, објави „Ројтерс“, повикувајќи се на три извори запознаени со разговорите.
Барањето доаѓа во период кога кинеските топилници се соочуваат со најголемиот недостиг на суровини за преработка во последните неколку децении. Кина рафинира до 60 отсто од светскиот катоден бакар, поради што стабилното снабдување со концентрат има стратешко значење за нејзината индустрија.
Според изворите на „Ројтерс“, кинеската Државна управа за регулирање на пазарот (SAMR) бара гаранции за количините бакарен концентрат што ќе бидат достапни за кинескиот пазар, вклучително и количините што се продаваат преку трговски посредници.
Регулаторот веќе добил забелешки од кинеските топилници и врз основа на нив разговара за можните услови за одобрување на трансакцијата.
Производството на рафиниран бакар во Кина годинава се очекува да забележи најбавен раст најмалку од 2000 година, додека топилниците се натпреваруваат за ограничените количества суровини.
Кина има важна улога во одобрувањето на зделката
Кина е голем купувач на бакарот произведен од двете компании, поради што одлуката на нејзиниот регулатор е една од клучните за реализација на спојувањето.
„Постигнуваме добар напредок кон завршување на процесот и конструктивно соработуваме со кинескиот регулатор SAMR во рамките на неговата структурирана постапка за разгледување“, соопштиле од „Англо Американ“ за „Ројтерс“.
„Тек Рисорсис“ не ги коментирала регулаторните постапки, додека SAMR не одговорил веднаш на барањето за коментар.
Најголем дел од производството на бакар на „Англо Американ“ од Перу и Чиле се продава во форма на нерафиниран концентрат на меѓународни купувачи, меѓу кои топилници во Кина, Јапонија и Европа.
Новиот рударски гигант би контролирал околу 5 отсто од светската понуда на бакар
Спојувањето на „Англо Американ“ и „Тек Рисорсис“ беше објавено во 2025 година. Компаниите досега добиле одобренија од регулаторите во земјите во кои работат, со исклучок на Кина, а очекуваат процесот да биде завршен до март 2027 година.
Обединетата компанија би контролирала околу 5 отсто од глобалната понуда на бакар, што е под вообичаените прагови од 10 до 15 отсто што предизвикуваат поголема загриженост од аспект на пазарната конкуренција.
Според изворите на „Ројтерс“, во оваа фаза кинескиот регулатор не бара продажба на дел од средствата на компаниите.
Случајот покажува дека бакарот и другите критични минерални суровини сè повеќе стануваат предмет не само на деловни, туку и на стратешки и регулаторни интереси. Земјите што зависат од увоз на минерални суровини сè почесто ги земаат предвид сигурноста на снабдувањето и националните интереси при разгледувањето на големите рударски трансакции.
Бакарот има особено значење за електрификацијата и енергетската транзиција поради неговата широка примена во електричните мрежи, обновливите извори на енергија и електричната опрема.
