Државата во вториот квартал од годинава наплатила речиси 300 милиони денари од концесиските надоместоци за експлоатација на минерални суровини.
Според податоците на Министерството за енергетика, рударство и минерални суровини, во периодот април-јуни биле наплатени вкупно 299.461.897 денари, односно околу 4,87 милиони евра.
Сумата е нешто повисока од наплатата во истиот период лани. Во вториот квартал од 2025 година по овој основ биле собрани 293.330.528 денари, што значи дека годинава приходите се зголемени за околу 6,1 милиони денари.
Разликата е уште позначајна во споредба со 2024 година. Тогаш, во вториот квартал, од концесиските надоместоци биле наплатени 136.204.491 денар, па овогодишната наплата е повеќе од двојно поголема.
Од Министерството посочуваат дека резултатите се поврзани со подобрувањето на системот за наплата и засилениот надзор над исполнувањето на обврските што произлегуваат од концесиските договори.
Со наплатата во вториот квартал, приходите од концесиските надоместоци продолжуваат да претставуваат значаен приход за државниот буџет од секторот на минералните суровини.
