Светот влегува во досега најголемиот инвестициски суперцикл во историјата на металургијата и рударската индустрија, изјави канадскиот министер за енергетика и природни ресурси, Тим Хоџсон, за време на неговото обраќање во Лондон. Според него, критичните минерали повеќе не се само обични индустриски стоки, туку стратешки суровини кои директно ќе одредуваат кои економии ќе растат и ќе ја обезбедат својата иднина.
Хоџсон истакна дека следниот бран на масовни рударски инвестиции ќе расте поради незаситиот пазарен глад, но и од сè поголемиот страв на државите за безбедноста и сигурноста на синџирите за снабдување.
Геополитиката го диктира пазарот
Канадскиот министер посочи на историска промена во корпоративното размислување.
Некогаш компаниите набавуваа метали и минерали исклучиво водени од цената и ефикасноста.
Денес, главни фактори при изборот се извозните контроли, геополитичките ризици и трговската изложеност во конфликтните региони.
Со оглед на тоа што Кина во неколку наврати воведе рестрикции за извоз на ретки земјени елементи, Хоџсон нагласи дека светот денес не се соочува со недостиг на побарувачка, туку со акутен недостиг на сигурно и предвидливо снабдување.
Канадски модел: Одобрување рудници за само 1 година?
За да капитализира од овој претстоен инвестициски бум и да одговори на предизвиците, Канада започна со агресивни регулаторни реформи.
Незиниот Предлог-закон за градење силна Канада има за цел драматично да ги скрати бирократските процедури.
Наместо досегашните процеси на одобрување кои за големите рударски проекти знаеја да траат и над 10 години, Отава воведува систем на ревизија преку една федерална агенција со краен рок од само една година.
Министерот Хоџсон призна дека и покрај извонредното рудно богатство, Канада историски кубурела со брзината на реализација на проектите. Сега, со побрзи дозволи и силни стратешки партнерства со локалните домородни заедници, земјата сака да се наметне како главен глобален партнер на Западот за критични минерали.
